Cuaderno de viaje: Expedición Everest 2008

Itxaropena etsipen bihurtzen da

Maiatzak 3. Berriro deitu digute kanpaleku nagusitik. Ahotsa aldatu zaie, triste eta etsita nabaritu ditugu. Kokoteraino daude espedizioa bizitzen ari den egoerarekin eta Txina ipintzen ari zaien trabekin. Denbora agortzen ari da eta beraiek kirol gesta egitera soilik joan dira haraino, baina politika eta olinpiada kontuek bete-betean hartu dituzte.

Kanpaleku nagusian "etsipena" nagusi dela esan digute. Goi karguetako jendea etorri da helikopteroetan, turismo ministroak eta militarrak, ehun bat pertsonarekin biltzera.

Badirudi iragarpenik ezkorrenak gauzatuko direla eta maiatzaren 10era arte ez dutela igotzerik izango. Albisteak gauzak zaildu dizkie, maiatzaren 26an Euskal Herrira itzuli behar dutelako eta gailurrera heltzeko 15 egun baino geratuko ez zaielako.

Haserrea nabari zaie, hitzik ere ez dute. Hain denbora gutxi izateak igoera zailtzen die eta arrisku handiagoa hartzea eskatzen die. Hainbeste trabarekin ez dira behar bezala girotu ere, 3 eta 4 kanpalekuak ez daude hornituta eta, gainera, sherpek ezin izan dute 3rako pareta osorik hornitu. Eguraldia lagun izango omen dutela, horixe da geratzen zaien kontsolamendu bakarra.

Oso hunkituta, oxigeno apur bat bilatzen saiatzen ari direla esan digute, hasiera batean oxigenorik gabe igortzekoak ziren arren, azkenean gailurra iristen saiatuko direla, oxigenoa erabilita bada ereo.

Badirudi bihar 2. kanpalekura igotzen utziko dietela; ez dute han lo egiterik izango eta kanpaleku nagusira itzuli beharko dute lotara; motxilak erregistratu, dokumentazioa aztertu eta zenbat pertsona eta pasaporte dagoen ikuskatuko diete horretarako, jakina.

Egoera gero eta zailagoa da, eta kanpaleku nagusian itxarotea morala hondatzen ari zaie. Tentsio handia pairatzen ari dira eta gauzak okerrera doaz. Ez da halako erronka bati heltzeko urterik egokiena, zenbat traba jartzen dituzten ikusita.

Hala ere, amorruzko hitzak dituzte azkenak, helburua gailurrera heltzea dela eta ez direla gailurrik egin gabe itzuliko esan digute. Oraindik indartsu eta oso motibatuta daude.

Besarkada handi bat bidali digute eta laster aurrera eta gora egitea izango dutela espero dute.